Գլխավոր Մարզեր ՇԻՐԱԿ Շիրակի մարզը պատրաստ է ցանկացած օրակարգով համագործակցելու Իրանի հետ

Շիրակի մարզը պատրաստ է ցանկացած օրակարգով համագործակցելու Իրանի հետ

0

Շիրակի մարզպետ Հովհաննես Հարությունյանն երեկ ընդունել է Հայաստանում Իրանի Իսլամական Հանրապետության արտակարգ եւ լիազոր դեսպան Աբաս Բադախշան Զոհուրիի գլխավորած պատվիրակությանը։ Մարզպետը ողջունել է դեսպանին եւ ներկայացրել Շիրակի մարզը․ «Պարոն դեսպան, բարով եք եկել մեր մարզ։ Դուք Հայաստանի հյուրընկալ ու կոլորիտային մարզերից մեկում եք։ Մեր մարզն, իհարկե, բազմաթիվ խնդիրներ ու դժվարություններ է տեսել։ Բայց առաջ ենք քայլում եւ դեռ կկարողանանք տարբեր ոլորտներում ձեռքբերումներ ունենալ։ Մեզ համար շատ կարեւոր է համագործակցությունը եւ իմ անունից վստահեցնում եմ, որ Շիրակի մարզը պատրաստ է ցանկացած օրակարգով՝ իրավասությունների շրջանակներում, համագործակցելու եւ համատեղ ծրագրեր իրականացնելու»։

Աբաս Բադախշան Զոհուրին շնորհակալություն է հայտնել Հովհաննես Հարությունյանին ջերմ ընդունելության համար եւ նշել, որ շատ ողջունելի է համարում մարզային իշխանությունների պատրաստակամությունը համագործակցելու եւ համատեղ նախագծեր կյանքի կոչելու առումով․ «Պարոն Հարությունյան, շատ ուրախ եմ, որ ձեր կողմից էլ զգում եմ համագործակցության պատրաստակամություն, սա հնարավորություն կտա մեզ համատեղ ծրագրեր իրականացնել տարբեր ոլորտներում։ Մեր երկրների միջեւ դարավոր բարեկամությունն ամրապնդելու առումով շատ ենք կարեւորում նաեւ Հայաստանի մարզերի հետ համատեղ ծրագրերի իրականացումը»։

Կողմերը ձեռք են բերել պայմանավորվածություն համատեղ աշխատանքային խումբ ստեղծելու առնչությամբ, ինչը հնարավորություն կտա համագործակցության ոլորտներն հստակեցնելու եւ գործնական քայլեր իրականացնելու։

Մեկնաբանել