Հանրապետության առանձին շրջաններում, այդ թվում՝ Երեւանում, կարճատեւ անձրեւներ են սպասվում, «Ֆեյսբուք»-ի իր էջում հայտնել է «Հիդրոօդերեւութաբանության եւ մոնիթորինգի կենտրոն»-ի տնօրենի տեղակալ Գագիկ Սուրենյանը:
«Շուրջ 17 օր է՝ հանրապետությունում, գրեթե, տեղումներ չեն եղել։ Վերջապես, նոյեմբերի 15-16-ին եւ նոյեմբերի 16-ի լույս 17-ի գիշերը մեր երկիրը կգտնվի Միջերկրական ծովից ներթափանցած, բայց թույլ արտահայտված ցիկլոնի ազդեցության գոտում, որն իր հետ հանրապետության առանձին շրջաններում, այդ թվում՝ Երեւանում, կբերի կարճատեւ անձրեւներ։ Օդի ջերմաստիճանը նոյեմբերի 15-16-ին՝ ցերեկային ժամերին, ամպամածության ծածկով պայմանավորված, մի փոքր կնվազի, բայց քանի որ նոյեմբերի 17-ին ցերեկային ժամերին կրկին ակտիվանալու են հարավ-արեւմտյան տաք օդային հոսանքները, այն նորից կբարձրանա»,- նշել է Սուրենյանը։
Նոյեմբերի 17-ի ցերեկային ժամերից սկսած՝ տեղումները հանրապետության ամբողջ տարածքում կդադարեն եւ դրան հաջորդող օրերին կրկին Հայաստանի ամբողջ տարածքում կհաստատվի ջերմ եւ առանց տեղումների եղանակ։
0 Մեկնաբանություն