.jpg)
Հանրային ծառայությունները կարգավորող հանձնաժողովի հաստատած ՀԷՑ-ի 2026 թվականի Ներդրումային ծրագրի ընդհանուր բյուջեն կազմում է շուրջ 46,7 մլրդ ՀՀ դրամ (առանց՝ ԱԱՀ), որի մոտ 75-80%-ը կազմում են աշխատանքի համար անհրաժեշտ էլեկտրատեխնիկական սարքավորումներն ու տարատեսակ նյութերը։
Այս մասին Ֆեյսբուքի իր էջում գրել է ՀԷՑ-ի ժամանակավոր կառավարիչ Ռոմանոս Պետրոսյանը։ Այս պահին ինտենսիվ ընթանում են կապալի (շինարարական) աշխատանքների ձեռք բերման մրցույթների ամփոփման եւ պայմանագրերի կնքման գործընթացները, եւ բառացիորեն օրեր անց կմեկնարկեն բուն աշխատանքները։
«Անհրաժեշտ սարքավորումների եւ նյութերի ձեռք բերման գործընթացները եւս իրականացվում են բացառապես բաց, թափանցիկ, մրցութային եղանակով, որոնց 35-40%-ն արդեն իրականացվել է, եւ հսկայածավալ մատակարարումներն ընթացքի մեջ են»,-գրել է նա՝ հավելելով, որ ընթացիկ փուլում ՀԾԿՀ կողմից սահմանված՝ ՀԷՑ-ում գնումների կարգավորումներին խիստ համապատասխան եւ ՀՀ հանրային գնումների օրենսդրությանն առավելագույնս մոտարկված ընթացակարգերով ձեռք են բերվել ավելի քան 12,2 մլրդ ՀՀ դրամի ապրանքանյութական արժեքներ, որոնց համար ՀԷՑ-ի 2026թ. գնումների պլանում նախատեսված էր շուրջ 16,7 մլրդ ՀՀ դրամ ֆինանսական միջոցներ։
«Ըստ այդմ. այս փուլի համար՝ միայն 2026 թվականի Ներդրումային ծրագրի իրականացման շրջանակներում, բացառապես մրցության եւ ներառական գնումների արդյունքում ՀԷՑ-ում ունենք ավելի քան 4,5 մլրդ ՀՀ դրամի խնայված ֆինանսական միջոցներ, որոնք ամբողջովին ուղղվելու են բաշխման ցանցի ենթակառուցվածքների արդիականացմանը։ ՀԷՑ-ն այլեւս ծառայում է մեր ժողովրդին»,-գրել է Ռոմանոս Պետրոսյանը։
0 Մեկնաբանություն