Մայիսի 23-ին ձերբակալված «Մայր Հայաստան» կուսակցության նախագահ, «Բարգավաճ Հայաստան» կուսակցության ցուցակով պատգամավորի թեկնածու Անդրանիկ Թեւանյանի խափանման միջոցը որոշելու հարցը այս պահին քննարկվում է  Ավան եւ Նոր Նորք վարչական շրջանների ընդհանուր իրավասության դատարանում։

Հիշեցնենք, որ ՀՀ քննչական կոմիտեն պետական դավաճանության եւ լրտեսության դեպքի առիթով նախաձեռնել է քրեական վարույթ: Կոմիտեում ԱԱԾ-ից ստացված հաղորդման համաձայն՝ Թեւանյանը, 2024 թվականին հավաքագրվելով օտարերկրյա հատուկ ծառայությունների կողմից, «Ռուսսիա Կովկաս» աշխարհաքաղաքական կենտրոնի տնօրեն հանդիսացող՝ օտարերկրյա հատուկ ծառայությունների ներկայացուցչի հանձնարարությամբ կատարել է լրտեսություն:

Նա հավաքել եւ 622 հազար դոլարի դիմաց նրան է փոխանցել պետական գաղտնիք պարունակող՝ 2024 թվականի ապրիլին ԱԺ-ում տեղի ունեցած փակ, գաղտնի լսումներ-ի ընթացքի եւ արդյունքների մասին ռուսերեն թարգմանված տեղեկություններ՝ այդ կերպ կատարելով պետական դավաճանություն՝ ի վնաս Հայաստանի Հանրապետության ինքնիշխանության, տարածքային անձեռնմխելիության եւ արտաքին անվտանգության:

Անդրանիկ Թեւանյանի շահերի պաշտպան  Արամ Օրբելյանը լրագրողների հետ ճեպազրուցում նշել է, որ «այն մեղադրանքի տեքստը, որը հիմա քննում է դատարանը, առնվազն դրանով չի կարելի ազատազրկման հարց քննարկել»։

Փաստաբանի խոսքով` գործի այն նկարագրությունը, որով առաջադրված է մեղադրանքը, բոլոր լրագրողներն այդ հատկանիշներով կարող են դատվել. խոսքը վերաբերում է ինֆորմացիայի տարածմանը, ինչ–որ բան հարցնել, իմանալուն։

«Մեր կարծիքով` քրեական հետապնդում հարուցելու հիմքեր չկան, այս նյութերից չի բխում որեւէ գործի հարուցում։ Մոտավորապես այն արգումենտացիան` հարուցենք, հետո քննենք, կալանավորենք, ապա ապացույցներ ձեռք կբերենք, մոտեցումն ընդունելի չէ. չի կարելի անձին մեղադրանք առաջադրել, երբ չունես անձին վերաբերելի, թույլատրելի բավարար ծավալի ապացուցողական բազա»,– ասել է Արամ  Օրբելյանը։

Նշենք, որ ՀՀ կենտրոնական ընտրական հանձնաժողովը բավարարել է դատախազության երկու միջնորդությունները՝ «Բարգավաճ Հայաստան» կուսակցության պատգամավորի թեկնածու Անդրանիկ Թեւանյանի նկատմամբ քրեական հետապնդում հարուցելու եւ ազատությունից զրկելու վերաբերյալ: