Ավարտվեց  հերթական նախընտրական քարոզարշավը՝ ժողովրդավարական գործընթացի կարեւորագույն այն փուլը, որի ընթացքում քաղաքական ուժերն ու թեկնածուները հանրությանը ներկայացրել են իրենց ծրագրերը, առաջնահերթություններն ու երկրի եւ համայնքների զարգացման վերաբերյալ իրենց պատկերացումները։ Այս մասին նշվում է նախընտրական քարոզարշավի ավարտի կապակցությամբ Հայաստանի  Հանրապետության նախագահ Վահագն Խաչատուրյանը ուղերձում։

«Սիրելի՛ հայրենակիցներ,

Ընտրությունները ժողովրդավարական պետության կենսագործունեության հիմնարար բաղադրիչներից են։ Դրանք ոչ միայն քաղաքական ընտրության հնարավորություն են, այլեւ հանրային պատասխանատվության, քաղաքացիական գիտակցության եւ պետական մտածողության կարեւորագույն դրսեւորում։

Յուրաքանչյուր ընտրական գործընթաց հնարավորություն է տալիս հասարակությանը գնահատելու անցած ճանապարհը, համադրելու տարբեր տեսլականներ եւ որոշելու այն ուղղությունը, որով ցանկանում է շարունակել իր զարգացումը։

Անցած շաբաթների ընթացքում քաղաքացիները հնարավորություն ունեցան ծանոթանալու տարբեր քաղաքական առաջարկների, լսելու զարգացման վերաբերյալ տարբեր պատկերացումներ եւ գնահատելու ներկայացված ծրագրերը։

Միաժամանակ քաղաքական գործընթացի բոլոր մասնակիցներն ունեցան իրենց մոտեցումները հանրության դատին ներկայացնելու լիարժեք հնարավորություն։ Ժողովրդավարության ուժը նախ եւ առաջ հենց այս հնարավորության մեջ է՝ գաղափարների մրցակցության, կարծիքների բազմազանության եւ ազատ ընտրության իրավունքի ապահովման մեջ։

Հարկ է նշել, որ ժողովրդավարությունը միայն ընտրական գործընթաց կամ իրավական ընթացակարգ չէ։ Այն նաեւ քաղաքական մշակույթ է, հանրային հարաբերությունների որակ եւ հասարակության հասունության արտահայտություն։

Քարոզարշավի ընթացքում երբեմն տեղ են գտել երեւույթներ եւ խոսույթի դրսեւորումներ, որոնք լիովին չեն արտացոլել այն բարձր չափանիշները, որոնց ամրապնդմանը ձգտում է մեր հանրությունը։

Այս հանգամանքի արձանագրումն ամենեւին նպատակ չունի գնահատական տալու քաղաքական գործընթացի որեւէ մասնակցի կամ առանձին դրվագի։ Այն առավելապես հիշեցում է, որ ժողովրդավարությունը շարունակական զարգացման եւ կատարելագործման ճանապարհ է, եւ մենք բոլորս՝ պետական ինստիտուտները, քաղաքական ուժերը, քաղաքացիական հասարակությունը եւ քաղաքացիները, դեռեւս ունենք համատեղ անելիք քաղաքական բանավեճի մշակույթի, փոխադարձ հարգանքի, փաստարկված քննարկումների եւ հանրային պատասխանատվության արժեքների առավել ամրապնդման գործում։

Սակայն այժմ նախընտրական մրցակցությունն ավարտվում է, եւ խոսքը պատկանում է քաղաքացիներին։

Առջեւում լռության օրն է։ Դա ոչ միայն քաղաքական գործընթացի դադար է, այլեւ յուրաքանչյուր քաղաքացու համար կարեւոր հնարավորություն՝ հանգիստ եւ անաչառ կերպով գնահատելու լսածն ու տեսածը, կշռադատելու ներկայացված ծրագրերն ու խոստումները եւ կայացնելու սեփական գիտակցված որոշումը։

Ժողովրդավարության իրական արժեքը դրսեւորվում է այն պահին, երբ քաղաքացին, առաջնորդվելով իր համոզմունքներով եւ պատասխանատվության զգացումով, կատարում է ազատ ու գիտակից ընտրություն։

Ընտրությանը մասնակցելը պարզապես իրավունքի իրացում չէ։ Դա պետության ներկայի եւ ապագայի նկատմամբ պատասխանատվության կարեւորագույն դրսեւորումներից է։ Ժողովրդավարական համակարգերի կայունությունն ու կենսունակությունը մեծապես պայմանավորված են քաղաքացիների մասնակցությամբ, նրանց պատրաստակամությամբ՝ սեփական ներդրումն ունենալու հանրային որոշումների կայացման գործընթացում։

Քվեարկության օրը գնացե՛ք ընտրատեղամասեր՝ առաջնորդվելով բացառապես ձեր խղճի, ազատ կամքի եւ համոզմունքների թելադրանքով։ Ձեր ընտրությունը կատարե՛ք սթափ դատողությամբ, պատասխանատվության բարձր զգացումով եւ այն գիտակցությամբ, որ յուրաքանչյուր քվե իր նշանակությունն ունի ոչ միայն տվյալ ընտրության արդյունքի, այլեւ մեր պետության ժողովրդավարական զարգացման, ինստիտուցիոնալ ամրապնդման եւ ապագայի կառուցման գործում։

Վստահ եմ, որ մեր ժողովուրդը, առաջնորդվելով իր փորձով, քաղաքական հասունությամբ եւ պետական պատասխանատվության զգացումով, կկատարի արժանապատիվ եւ գիտակցված ընտրություն՝ հանուն Հայաստանի Հանրապետության հետագա զորացման, ժողովրդավարական արժեքների ամրապնդման, հանրային համերաշխության եւ կայուն զարգացման։

Մաղթում եմ, որ ընտրություններն անցնեն ազատ, խաղաղ, արժանապատիվ եւ օրենքի գերակայության սկզբունքներին լիովին համահունչ մթնոլորտում՝ ամրապնդելով հանրային վստահությունը ժողովրդավարական ինստիտուտների նկատմամբ եւ ծառայելով մեր պետականության շարունակական զարգացմանն ու հզորացմանը»,- ասված է հաղորդագրությունում։