.jpg)
Ազգային ժողովում փետրվարի 10-ին, ՀՀ արդարադատության նախարարի տեղակալ Գեւորգ Քոչարյանը ներկայացրեց Քրեակատարողական օրենսգրքում նախատեսվող փոփոխությունները, որոնց նպատակն է կարգավորել երկարատեւ բժշկական օգնության եւ սպասարկման կարիք ունեցող դատապարտյալների բուժման կազմակերպումը։ Ըստբփոխնախարարի՝ ՀՀ կառավարության համապատասխան որոշմամբ դադարեցվել է արդարադատության նախարարության «Դատապարտյալների հիվանդանոց» քրեակատարողական հիմնարկի գործունեությունը։ Դրա փակմամբ պայմանավորված՝ նշված գործառույթը այսուհետ իրականացվում է «Արմավիր» քրեակատարողական հիմնարկում գործող նորաբաց բժշկական ստորաբաժանման միջոցով։
Գեւորգ Քոչարյանի խոսքով՝ գործող իրավակարգավորումների համաձայն երկարատեւ բուժօգնության, սպասարկման եւ խնամքի կարիք ունեցող դատապարտյալները նախկինում տեղափոխվում էին բուժական քրեակատարողական հիմնարկ՝ «Դատապարտյալների հիվանդանոց» ՔԿՀ։ Սակայն վերջինիս գործունեության դադարեցմամբ առաջացել է օրենսդրական հստակեցման անհրաժեշտություն։
«Նախագծով առաջարկվում է, որ հիվանդանոցային պայմաններում բժշկական օգնության եւ սպասարկման կարիք ունեցող դատապարտյալները տեղափոխվեն այն քրեակատարողական հիմնարկ, որտեղ տեղակայված է բժշկական օգնության եւ սպասարկման համապատասխան լիցենզիա ունեցող բժշկական ստորաբաժանումը»,- նշեց նախարարի տեղակալը։ Գեւորգ Քոչարյանի հավաստմամբ, փոփոխության հիմնական տրամաբանությունն այն է, որ բժշկական օգնությունը կազմակերպվի առավել օպերատիվ եւ արդյունավետ ձեւով՝ հենց քրեակատարողական հիմնարկի տարածքում կամ անմիջական հարեւանությամբ։
«Այդ կերպ նվազագույնի կհասցվեն լոգիստիկ տեղափոխման անհրաժեշտությունները, իսկ բուժօգնությունը կլինի ավելի հասանելի եւ արագ»,-ընդգծեց Քոչարյանը։
Ինչպես հայտարարարեց ոլորտի պատասխանատուն, կառավարության տեսլականում կա հետագայում այլ քրեակատարողական հիմնարկներում եւս երկարատեւ բուժման հնարավորություններ ստեղծելու ծրագիր՝ փոքր ծավալներով, սակայն ներկայում նման հնարավորություն ունի միայն «Արմավիր» ՔԿՀ-ի ստորաբաժանումը։
0 Комментарий