Հուլիսի 4-ին «Ի պաշտպանություն Սամվել Կարապետյանի» հավաք-երթ էր կազմակերպվել։ Մինչեւ երթը, Երթը սկիզբ առավ Մաշտոցի պողոտայի «Սիզոնսի» այգում  մեծ հավաք տեղի ունեցավ, որտեղ ելույթ ունեցան «Տաշիր» ընկերությունների խմբի փոխնախագահ, «ՀԷՑ» ՓԲԸ տնօրենների խորհրդի նախագահ Նարեկ Կարապետյանը, ԱԺ պատգամավորներ, հոգեւորականներ։

Հետո հավաքի մասնակիցները շարժվեցին «Երեւան-Կենտրոն» քրեակատարողական հիմնարկ, որտեղ պատիժ է կրում Սամվել Կարապետյանը։ Նշենք, որ ՔԿՀ-ն տեղակայված է Ազգային անվտանգության ծառայության վարչական տարածքում։ Երթի ժամանակ  հնչել են հայրենասիրական երգեր, մասնակիցները պարբերաբար վանկարկում էին «Սամվել, Սամվել», իսկ երթի կարգախոսն էր «Պայքար՝ մեր ձեւով»։

Հավաքին եւ երթին ներկա էին  նաեւ Սամվել Կարապետյանի ընտանիքը՝ կինը եւ երեխաները, ինչպես նաեւ գործարարի եղբայրը՝ Կարեն Կարապետյանը։

ԱԱԾ-ի առաջ փաստաբան  Արամ Վարդեւանյանն ընթերցեց Սամվել Կարապետյանի ուղերձը։

«Սիրելի հայրենակիցներ,

անցած մի քանի օրերն, առանց որեւէ չափազանցության իմ կյանքի ամենակարեւոր օրերից էին: Լինելով ապօրինի կալանքի տակ, ես այնուամենայնիվ, ոչ մի վայրկյան ոչ մեկուսացում, ոչ էլ մենակություն եմ ապրել: Այն բարեկամական սերը եւ հարգալից վերաբերմունքը, որ զգացել եմ հազարավոր մեր հայրենակիցներից ինձ հասանելի լրատվամիջոցներով, ինչպես նաեւ տարատեսակ աջակցության ու օգնության այն անկեղծ առաջարկները, որ ինձ հասու շփումներով ստացել եմ, ոչ միայն իմ բարեկամներից, ընկերներից ու ծանոթներից, այլեւ հազարավոր անծանոթ մարդկանցից՝ կարող են երջանկացնել յուրաքանչյուր մարդու:
Մեկուսարանի պատերը եւ ճաղերը բացարձակ նեղություն չեն, երբ գործդ ու կյանքդ այսչափ գնահատված են մարդկանց կողմից: Շնորհակալություն Ձեզ, սիրելի հայրենակիցներ, որ կաք եւ այսպիսինն եք:

Ձեր վերաբերմունքը որքան ոգեւորիչ է, այնքան էլ պարտավորեցնող: Ինձ համար այն առնվազն երկու բան է նշանակում. նախ, առաջինը. մեր հայրենակիցների մեծամասնությունը համաձայն է ինձ հետ, ու գտնում է, որ փոքրիկ մի խմբակ, տեւական ժամանակ ուրանալով մեր պատմությունը եւ ավանդույթները, չի կարող իր նեղ շահերը հետապնդելով ոտնատակ անել մեր ինքնությունը: Իրավունք չունի հարձակվել մեր Հայ Առաքելական Սուրբ եկեղեցու վրա: Մենք դա թույլ չենք տալու՝ մեր ձեւով:
Եվ երկրորդը. մեր ժողովուրդը իր վերաբերմունքով ցույց է տալիս, որ մեկուսարանում եմ ոչ թե ես, այլ օրվա իշխանությունները, որոնք մեն-մենակ են՝ հայ ժողովրդից ու Հայաստանից հեռվացած, մեր պատմական արժեքներից մեկուսացած: Եվ մենք պետք է միասին ոչ միայն արձանագրենք այս իրողությունը, այլեւս քաղաքակիրթ ու քաղաքական ճանապարհով տեսանելի դարձնենք այն բոլորին:

Նիկոլ Փաշինյանն ու իր կառավարությունն անելիք չունեն Հայաստանում ու պետք է կապ չունենան հայ ժողովրդի ապագայի հետ:

Ես պատրաստ եմ անցել պայքարի ճանապարհով՝ հանուն մեր երկրի ու մեր հարազատ հողի, որը մեր փոխարեն ոչ ոք չի շենացնի ու չի պաշտպանի։
Գալիս է սկզբունքորեն նոր ուժի շուրջ միավորվելու, միասնական մեկ բռունցք դառնալու ժամանակը:

Հայաստանը պետք է դառնա բարեկեցիկ ու ժամանակակից, արդար ու ապահով երկիր, ներքին համերաշխության ու համախմբվածության երկիր, արցախցիների բոլոր իրավունքները իրականում պաշտպանող երկիր, իրապես ինքնիշխան ու վստահելի դաշնակից եւ արժանապատվությունը վերականգնած երկիր՝ անցյալում թողնելով սեւ-սպիտակի բաժանումը, ներազգային արհեստական պառակտումը, Սփյուռքի հետ հարաբերությունների քայքայումը, մեր երեխաների եւ երիտասարդների ճակատագրի անորոշությունը, բռնաճնշումներն ու ապօրինությունները, պարտությունն ու նվաստացումը, աղքատությունն ու հուսահատությունը:

Ես գիտեմ, ինչպես անել այս ամենը։ Ու անելու ենք միասին։

Մենք միասին ամբողջ աշխարհին պետք է ցույց տանք, որ հենց սա է հային վայել ձեւը:
Միասին՝ դեպի մեր պատմության նոր եւ լավագույն շրջան»։