.jpg)
ՀՀ կառավարությունն ընդառաջելով «Իրազեկ քաղաքացիների միավորում» հասարակական կազմակերպության դիմումին՝ աջակցելու է «Մի՛ դարձիր ընտրական հանցագործ» իրազեկման արշավին։ Այն կիրագործվի բացառապես հասարակական կազմակերպության ֆինանսական միջոցներով, հայտնում են վարչապետի աշխատակազմից։
Նախաձեռնությունն ուղղված է ընտրական գործընթացների օրինականության պահպանմանը եւ ընտրակաշառքի կանխարգելմանը։ Արշավի շրջանակում պատրաստվել են թեմայի վերաբերյալ տեղեկատվական թռուցիկներ, որոնք կտրամադրեն Հայաստանի Հանրապետություն մուտք եւ ելք գործող անձանց՝ օդանավակայաններում եւ սահմանային անցակետերում։
Այս հանրային հաղորդակցության նախաձեռնության նպատակն է քաղաքացիների՝ երկիր մուտք եւ ելք գործելու պահին ապահովել հստակ եւ հասկանալի իրազեկում՝ հիշեցնելով, որ քվեարկության համար գումար վերցնելը կամ առաջարկելը քրեական հանցագործություն է եւ ենթակա է պատասխանատվության թե՛ ընդունողի, թե՛ առաջարկողի համար։
Նախաձեռնությունը կրում է կանխարգելիչ բնույթ եւ միտված է նվազեցնել ընտրակաշառքի դեպքերը՝ բարձրացնելով իրավական գիտակցությունն ու տեղեկացվածությունը, հատկապես բարձր ռիսկի խմբերում։
Սահմանակետերում տեղեկատվության տրամադրումը ընտրվել է որպես թիրախային եւ ազդեցիկ գործիք՝ ապահովելու համար, որ քաղաքացիները նախապես տեղեկացված լինեն հնարավոր իրավական հետեւանքների մասին եւ զերծ մնան ապօրինի գործողություններից։
0 Комментарий