.jpg)
Ազգային ժողովի պաշտպանության եւ անվտանգության հարցերի հանձնաժողովում հունիսի 12–ին քննարկվելու է «Ճանապարհային երթեւեկության անվտանգության ապահովման մասին» օրենքում փոփոխությունների նախագիծը, որը վերաբերում է վարորդական իրավունքից զրկվածների համար կարգավորումների փոփոխությանը։ Այս մասին տեղեկացնում է News.am-ը։
Նախագիծը կներկայացնի անձամբ ՆԳ նախարար Արփինե Սարգսյանը։
Ներկայումս վարորդական իրավունքից զրկման ժամկետի ավարտից հետո բոլոր քաղաքացիները, անկախ նրանից՝ առաջին անգամ են զրկվել իրավունքից, թե ոչ, պարտավոր են կրկին հանձնել որակավորման քննություններ։
Այժմ առաջարկվում է ներդնել նոր համակարգ, որի համաձայն՝ վարորդական իրավունքից առաջին անգամ զրկված անձը կկարողանա այն վերականգնել առանց քննություն հանձնելու, եթե զրկման ժամկետի ավարտից հետո մեկ տարվա ընթացքում դիմի համապատասխան մարմնին։
Սակայն նման վերականգնումը կլինի որոշակի պայմաններով։ Մասնավորապես՝ վարորդական իրավունքը մեկ անգամ կվերականգնվի առանց քննության, քաղաքացին կվճարի 50 հազար դրամ պետական տուրք, նրա համար կսահմանվի մեկ տարվա փորձաշրջան, գործող 13 տուգանային միավորի փոխարեն նրան կտրամադրվի ընդամենը 6 միավոր։
Եթե փորձաշրջանի ընթացքում վարորդը սպառի իրեն հատկացված 6 տուգանային միավորը, ապա կրկին կզրկվի տրանսպորտային միջոց վարելու իրավունքից՝ մեկ տարի ժամկետով։
Ըստ նախագծի՝ վարորդական իրավունքից երկրորդ կամ հաջորդ անգամ զրկված անձինք նախկինի պես իրավունքները կկարողանան վերականգնել միայն որակավորման քննություններ հանձնելուց հետո։
Միաժամանակ առաջարկվում է անցումային դրույթ, որի համաձայն՝ 2020 թվականի հունվարի 1-ից հետո վարորդական իրավունքից զրկված քաղաքացիները եւս հնարավորություն կունենան օգտվել նոր կարգավորումից։ Այսինքն կկարողանան առանց քննության վերականգնել իրենց վարորդական իրավունքները՝ վճարելով սահմանված պետական տուրքը եւ մեկ տարվա ընթացքում գտնվելով 6 տուգանային միավորով փորձաշրջանում։
Այս կարգավորումը չի վերաբերում դատարանների կամ օտարերկրյա պետությունների իրավասու մարմինների կողմից կիրառված զրկումներին, ինչպես նաեւ առողջական կամ այլ իրավական հիմքերով վարելու իրավունքի դադարեցման դեպքերին։
Ի դեպ, հունիսի 7-ին ՀՀ ԱԺ ընտրությունների նախընտրական քարոզարշավի ժամանակ էր Նիկոլ Փաշինյանը վարորդական իրավունքից զրկվածներին խոստացել էր այդ հարցը լուծել:
0 Комментарий