Օգոստոսի 2-ին մեկնարկել է Հայաստանի Հանրապետության Ազգային ժողովի 9-րդ  գումարման առաջին նստաշրջանը, որի օրակարգում  ընդգրկված է 8 հարց: Այս Ազգային ժողովում ներկայացված է 3 քաղաքական ուժ։ «Քաղաքացիական պայմանագիր» կուսակցությունն ունի 64, «Ուժեղ Հայաստան» դաշինքը՝ 29, իսկ «Հայաստան» դաշինքը՝ 12 մանդատ։ Խորհրդարանն, ընդհանուր առմամբ կազմված է 105 պատգամավորից։

Մինչեւ Ազգային ժողովի նախագահի ընտրությունը նիստը վարում է նորընտիր խորհրդարանի տարիքով ավագ պատգամավոր Կնյազ Հասանովը։

Հայաստանի Ազգային ժողովի 9-րդ գումարման «Քաղաքացիական պայմանագիր» խմբակցության պատգամավոր Կնյազ Հասանովը, որը որպես տարիքով ավագ պատգամավոր վարում է նոր ձեւավորված խորհրդարանի առաջին նիստը, պատգամավորներին կոչ է արել միասնական լինել, մի կողմ դնել տարաձայնությունները եւ համախմբվել պետության շուրջ։

«Ինձ համար հաճելի, միաժամանակ պատվաբեր եւ պատասխանատու պահ է։ Ես ինձ շատ հպարտ եմ զգում։ Որպես տարիքով ավագ պատգամավոր՝ իմ տարիքը հաշվի առնելով, ինձ հնարավորություն է ընձեռվել Հայաստանի Հանրապետության Ազգային ժողովի 6-րդ, 7-րդ, 8-րդ եւ այսօր էլ 9-րդ գումարման առաջին նստաշրջանը բացելու համար։

Երեւի իմ տարիքը հնարավորություն է տալիս նաեւ մի մեծ խնդրանքով դիմել ձեզ։ Ես խնդրում եւ հորդորում եմ իմ դիմադիր եւ ընդդիմադիր բոլոր քույր եւ եղբայր պատգամավորներին՝ եկեք լինենք միասնական, մի կողմ թողնենք բոլոր տարաձայնությունները, հավաքվենք մեր պետության եւ կառավարության շուրջ, անենք ամեն ինչ, որպեսզի մեր երկիրն ընթանա ճիշտ զարգացման ճանապարհով»,- ասել է Հասանովը։

Նրա խոսքով՝ Հայաստանին եւ հայ ժողովրդին խաղաղությունն այսօր անհրաժեշտ է օդ ու ջրի պես։

«Այսօր մեզ համար, մեր ժողովրդի համար օդ ու ջրի պես անհրաժեշտ է խաղաղությունը, որի շնորհիվ մեր երկիրը պետք է տնտեսապես զարգանա եւ հզորանա։ Միայն հզոր երկրի հետ եւ՛ թշնամիները, եւ՛ բարեկամները սկսում են հաշվի նստել։

Պատերազմը ոչ մի լավ բան չի բերում՝ բացի ավերածությունից, արյունահեղությունից, մարդկային զոհերից ու կորուստներից։ Դրա համար պետք է անել ամեն ինչ, որպեսզի հարցերը չլուծվեն պատերազմի միջոցով, այլ՝ դիվանագիտական, խաղաղ ճանապարհով»,- նշել է Հասանովը։

Հասանովի խոսքով՝ ՀՀ վարչապետ Նիկոլ Փաշինյանի վարած արտաքին քաղաքականության շնորհիվ մի շարք երկրների, այդ թվում՝ հարեւան պետությունների հետ հաստատվել են բարիդրացիական հարաբերություններ։

«Մեր հանրապետության վարչապետ, հարգարժան Նիկոլ Փաշինյանի վարած արտաքին, ճիշտ ու հեռատես քաղաքականության շնորհիվ մի շարք գերտերությունների եւ հարեւան երկրների հետ հաստատվել են բարիդրացիական լավ հարաբերություններ, որոնց շնորհիվ Հայաստանի Հանրապետությունն ապրում է եւ կապրի երկարատեւ խաղաղության մեջ։

Մեր խելացի եւ հեռատես ժողովուրդն ընտրեց խաղաղության կուսակցությանը, հաղթեց խաղաղությունը։ Ես սրտանց շնորհավորում եմ նորընտիր պատգամավորներին՝ մաղթելով բեղուն աշխատանք, հեռատեսություն եւ անսպառ եռանդ»,- եզրափակել է Կնյազ Հասանովը։

Այնուհետեւ նա Հայաստանի Հանրապետության Ազգային ժողովի իններորդ գումարման առաջին նստաշրջանը հայտարարել է բացված։