Հայաստանի Հանրապետության արդարադատության նախարարության «Նուբարաշեն» քրեակատարողական հիմնարկում «Իրավական կրթության եւ վերականգնողական ծրագրերի իրականացման կենտրոն» ՊՈԱԿ-ի եւ հիմնարկի սոցիալական, հոգեբանական եւ իրավական աշխատանքների բաժնի նախաձեռնությամբ կազմակերպվել էր ցուցահանդես-միջոցառում, որի թեման Մովսես Խորենացու հայտնի տողերն էին՝ «Ով ենք մենք, որտեղից ենք գալիս եւ ուր ենք գնում»:
Այս մասին տեղեկացնում է քրեակատարողական ծառայության հանրային կապերի բաժինը։
Միջոցառման կազմակերպմանը մասնակցել են քրեակատարողական հիմնարկում իրենց պատիժը կրող 5 դատապարտյալ, այդ թվում նաեւ՝ ցմահ ազատազրկվածներ, որոնց օժանդակել են նրանց դասավանդող ուսուցիչները: Միջոցառումը տարբերվում էր մինչ այդ կազմակերպված ցերեկույթներից նրանով, որ միասին ելույթ են ունեցել եւ՛ ազատազրկված անձինք, եւ՛ դասավանդողները:
Միջոցառման թեման եւ գործողությունների առանցքը հայրենիքն էր, Հայաստանի երեկվա ու վաղվա օրը: Թեմայի ընտրությամբ մեկ անգամ եւս ընդգծվել է քրեակատարողական հիմնարկներում իրենց պատիժը կրող անձանց նվիրումն ու սերը հայրենիքի, նրա ապագայի նկատմամբ՝ անկախ գտնվելու վայրից:
Ցերեկույթն ավարտվել է ցուցահանդեսի բացմամբ, որտեղ ներկայացվել են դատապարտյալների ձեռքի աշխատանքները՝ ստեղծված տերբեր նյութերից եւ տարբեր ոճերով, որոնք խորհրդանշում են հիմնականում հայրենասիրություն, խաղաղություն, հոգու ներդաշնակություն եւ ազատության տենչ։
![](https://marzer.am/storage/news/April2024/qT6euEwHIGIJO0nv23go.jpg)
![](https://marzer.am/storage/news/April2024/03ZdFmhIfMfULrQ5kcyF.jpg)
![](https://marzer.am/storage/news/April2024/oqPB1ion0BF7O7sDQUTE.jpg)
![](https://marzer.am/storage/news/April2024/eHlVccVci1zjZCExTOLd.jpg)
![](https://marzer.am/storage/news/April2024/lZPgePBGkCvYQqfsHQ8s.jpg)
0 Մեկնաբանություն