ԿԳՄՍ նախարար Ժաննա Անդրեասյանը շնորհավորական ուղերձ է հղել Ուսանողների եւ երիտասարդների օրվա կապակցությամբ․

«Սիրելի՛ ուսանողներ եւ երիտասարդներ, 1919 թվականի մայիսի 16-ին՝ Հայաստանի առաջին հանրապետության հիմնադրման առաջին իսկ տարում, Նախարարների խորհուրդը որոշում ընդունեց Երեւանում համալսարան հիմնելու մասին։ Իր պետականությունը դժվարությամբ վերականգնած երկիրը, չնայած ծայրահեղ սուղ պայմաններին, իր առաջին իրավական ակտերից մեկով հիմնադրեց համալսարան։ Սրանում ամփոփված է այն բանաձեւը, որով Հայաստանը կանգուն է մինչ օրս. պետականությունն ու կրթությունը ծնվում են միասին, եւ մեկի ամրությունը ծառայում է մյուսի ամրությանը։

Ուսանողի օրը Հայաստանում պարզապես երիտասարդության տոն չէ. այն ամենամյա հիշեցում է այն մասին, որ լուսավոր միտքը մեր պետության բովանդակաստեղծ եւ կազմարար միավորն է։ Ժառանգելով այդ մտադրությունը եւ նախաձեռնությունը՝ Հայաստանի Հանրապետության Կառավարությունն այսօր եւս որդեգրել է կրթության միջոցով սեփական քաղաքացիների հզորացման հետեւողական քաղաքականությունը՝ համոզված լինելով, որ կիրթ եւ կարողունակ քաղաքացին հզորացնում է պետությունը եւ նպաստում վերջինիս առջեւ դրված առաջնահերթ նպատակների իրականացմանը։

Բարձրագույն կրթության ոլորտի բարեփոխման ճանապարհին արդեն իսկ շատ բան է արվել, եւ այդ փոփոխությունները ոչ թե մակերեսային են, այլ համակարգային։ Այսպիսով, 2025 թվականի սեպտեմբերի 11-ին ուժի մեջ մտավ «Բարձրագույն կրթության եւ գիտության մասին» ՀՀ օրենքը, որը հետխորհրդային ժամանակաշրջանում առաջին անգամ մեկ շրջանակի մեջ է միավորել ակադեմիական եւ գիտահետազոտական համակարգերի կառավարումը։

Ընթացիկ բարեփոխումները մեզ մոտեցնում են նաեւ ավելի ներառական եւ ավելի հասանելի կրթական համակարգի, որտեղ, շնորհիվ նոր կրթաթոշակային քաղաքականության, բավարար առաջադիմությամբ ուսանողը միջոցների բացակայության պատճառով դուրս չի մնա կրթական գործընթացից։

Վերջիվերջո, այս փոփոխությունները բերում են սովորողներին ավելի ճկուն կրթական համակարգ՝ թույլ տալով հարստացնել իրենց կրթական ուղին Հայաստանի ներսում եւ դրանից դուրս ակադեմիական շարժունության, կրեդիտների կուտակման եւ միկրոորակավորումների ձեռքբերման գործուն մեխանիզմներով։

Բարձրագույն կրթության բովանդակությանը զուգահեռ՝ փոխվում է նաեւ բարձրագույն կրթության ֆիզիկական միջավայրը՝ ի դեմս «Ակադեմիական քաղաք» նախագծի, որն արդեն առաջին փուլում՝ 2030 թվականին, հնարավորություն կընձեռի ուսանողներին սովորելու առաջատար սարքավորումներով վերազինված ընդարձակ տեխնոլոգիական կլաստերում եւ օգտվելու տարածքում տեղակայված ակադեմիական եւ մշակութային ենթակառուցվածքներից, մինչեւ 3600  ուսանողի հյուրընկալելու տարողություն ունեցող ուսանողական կացարաններից։

Ներկայիս ուսանողների մի մասը կհասցնի սովորել այդ միջավայրում, իսկ լավագույնները կդասավանդեն եւ հետազոտություններ կիրականացնեն այնտեղ։

Պետական աջակցությամբ ստեղծվել եւ գործունեություն են ծավալում 13 երիտասարդական կենտրոններ, մինչեւ 2026 թվականի տարեվերջ կվերազինվեն եւ կվերագործարկվեն եւս 6 երիտասարդական կենտրոններ, որոնց առաքելությունն է՝ դառնալ ոչ ֆորմալ կրթության, գաղափարների իրագործման, համայնքային զարգացման եւ ստեղծագործ մտքի խթանման կարեւոր հարթակներ:

Որակյալ ենթակառուցվածքների, առաջատար կրթական ծրագրերի, միջազգային համատեղ լաբորատորիաների, երիտասարդական միջավայրերի ստեղծումն այն կայուն հիմքն է, որն ուսանողին ու երիտասարդին մղում է ապրելու եւ արարելու Հայաստանի Հանրապետությունում՝ զգալով պետությունը որպես հենարան»,-նշվում է հայտարարության մեջ: