Ադրբեջանի Երիտասարդության եւ սպորտի նախարարությունը եւ ազգային օլիմպիական կոմիտեն նամակ են հղել Միջազգային օլիմպիական կոմիտեին (ՄՕԿ)՝ բողոքելով «հակաադրբեջանական սադրանքից»։ Այս մասին տեղեկացնում է News.am-ը՝ նշելով, որ այս դեմարշի առիթը Օլիմպիական խաղերի հեռարձակման հաղորդավարի` Սենայով օլիմպիական թիմերի շքերթում հայ մարզիկների անցնելու ժամանակ Հայաստանին ուղղված բարեկամական արտահայտությունն է եղել։
«Անկասկած, հայերը մեր բարեկամներն են, եւ Հայաստանը պատմականորեն ֆրանսիացիներին հոգեհարազատ երկիր է։ Անցյալ տարին Հայաստանի համար սգո տարի էր եւ հանգեցրեց Ղարաբաղի կորստին, որն անցավ ադրբեջանական բանակի ձեռքը»,- ֆրանսիացի հաղորդավարի խոսքն են մեջբերում ադրբեջանական լրատվամիջոցները։
Մինչդեռ Ադրբեջանում այս հայտարարության պատճառով սկսեցին խոսել «անհարգալից վերաբերմունքի» եւ «Օլիմպիական խարտիայի խախտման» մասին։
«Նամակում ասվում է, որ Ադրբեջանի նկատմամբ պետական հեռուստաալիքի նման անհարգալից վերաբերմունքը Օլիմպիական խարտիայի ակնհայտ խախտում է։ Նման քարոզչությունը հակասում է խաղերի ոգուն եւ ծառայում է Ադրբեջանի եւ Հայաստանի միջեւ խաղաղության ջանքերի ձախողմանը։ Ուստի ՄՕԿ-ին առաջարկվել է վճռական դիրքորոշում ընդունել 2024 թվականի Փարիզի Օլիմպիական խաղերի ժամանակ սպորտի քաղաքականացման դեմ, հրապարակային հայտարարություն անել եւ բողոք ներկայացնել կառավարությանը, Ֆրանսիայի ազգային օլիմպիական եւ մարզական կոմիտեին, ինչպես նաեւ վերոնշյալ հեռուստաալիքին», հաղորդում են ադրբեջանական լրատվամիջոցները։
0 Comments