Ռուբեն Վարդանյանը ներկայացվել է 2024 թ. Խաղաղության Նոբելյան մրցանակի՝  իր բարեգործական եւ մարդասիրական գործունեության համար: Նրա թեկնածությունն առաջադրել են մի շարք հեղինակավոր անձինք, որոնցից թվում նաեւ Խաղաղության Նոբելյան մրցանակի դափնեկիր կա:

NEWS.am-ի արտերկրի աղբյուրներից ստացված այս լուրը հաստատեցին նաեւ Ռուբեն Վարդանյանի գրասենյակից: «Հեղինակավոր անձանց կողմից Ռուբեն Վարդանյանը ներկայացվել է այդ բարձր մրցանակին՝ շուրջ հինգ տասնյակի հասնող նոր եւ աննախադեպ կրթական, բարեգործական, գիտական եւ մարդասիրական կառույցների ստեղծման ու օժանդակման համար ոչ միայն Հայաստանում, այլեւ մի շարք երկրներում: Առաջադրողները տպավորիչ եւ միջազգային գնահատականի արժանի են համարել Ռուբեն Վարդանյանի՝ որպես մարդասերի եւ բարերարի կերպարը եւ նրա հետեւողական ջանքերը՝ ուղղված անգամ պատերազմների ու դրանց սպառնալիքի,  ֆինանսական եւ քաղաքական ճգնաժամերի  ընթացքում մարդասիրական, բարեգործական  ու սոցիալական ծրագրերի միջոցով երկարատեւ կայունության ու զարգացման գործիքների ներդրմանը:

Այդ համատեքստում մասնավորապես հիշատակվել է նրա գործունեությունը շրջափակված Արցախում, որտեղ Ռուբեն Վարդանյանը մեծ ջանքեր է ներդրել ՝ փորձելով ոչ միայն մեղմել մարդասիրական ծանր կարիքները, այլեւ դժվարին վիճակում հայտնված մարդկանց ու երեխաների կենսական պայմանների բարելավման հնարավորություններ ստեղծել:

Գնահատելի է համարվել այն, որ Ռուբեն Վարդանյանի բարեգործությունն ընդգրկում է ոչ միայն ազգային, այլեւ միջազգային մակարդակները եւ  գլոբալ ազդեցություն ու նշանակություն ունի: Նրա  հեղինակային խոշոր  նախագծերից մեկը՝ «Ավրորա» մարդասիրական նախաձեռնությունն ուղղված է աշխարհի բոլոր անկյուններում, բոլոր մայրցամաքներում օգնելու եւ ձեռք մեկնելու  բոլոր նրանց, ովքեր վտանգելով սեփական կյանքը բարիք են գործում: Վարդանյանին առաջադրման ներկայացված հարգարժան անձանց նամակում կարեւոր է  համարվում նաեւ այն,  որ նա հարգալից է եղել ոչ միայն իր ժողովրդի, կրոնի, այլեւ այլոց ժառանգության նկատմամբ. որպես դրա վառ օրինակ նշվում է Ռուբեն Վարդանյանի նախաձեռնությամբ վերանորոգված Շուշիի իրանական մզկիթը»,- News.am-ին հայտնեցին Ռուբեն Վարդանյանի գրասենյակից:

Նշենք, որ Հայաստանում Ռուբեն Վարդանյանի կողմից իրականացվել են մի շարք խոշոր նախագծեր: Դրանց թվում է, օրինակ, «Տաթեւի վերածնունդ»-ը, որի շրջանակում կառուցվել է աշխարհի ամենաերկար հետադարձելի ճոպանուղին՝ «ՏաԹեւեր»-ը, վերականգնվել է  Տաթեւի վանական համալիրը,  զարգացման հնարավորություններ են ստեղծվել հարակից համայնքների համար:

Խոշոր նախագծերից է նաեւ Հայաստանում UWC Դիլիջան քոլեջի հիմնումը, որը  United World Colleges՝  «Աշխարհի միացյալ քոլեջներ» ցանցի՝ աշխարհում գտնվող  18 քոլեջներից մեկն է։ Այն ցանցի առաջին քոլեջն է հետխորհրդային տարածքում:

Գրասենյակից հայտնեցին, որ Ռուբեն Վարդանյանը, իր գործընկերների հետ համատեղ, ընդհանուր առմամբ շուրջ 700 նախագիծ է իրականացրել Հայաստանում, Արցախում եւ հայկական աշխարհում` ներդրումներ անելով մարդասիրության, կրթության,  պատմամշակութային ժառանգության պահպանության, զբոսաշրջության ու ենթակառուցվածքների զարգացման եւ  մի շարք այլ ոլորտներում:

Հիշեցնենք, որ 2022 թվականի սեպտեմբերին Ռուբեն Վարդանյանը հայտարարեց Արցախի Հանրապետություն տեղափոխվելու մասին։ Որոշ ժամանակ անց՝ 2022թ. նոյեմբերի  4-ին նա ստանձնեց Արցախի Հանրապետության պետնախարարի պաշտոնը:

2023թ. փետրվարի 23 -ին Ռուբեն Վարդանյանին ազատեցին պետնախարարի պաշտոնից, բայց նա շարունակեց մնալ Արցախում եւ իր հիմնադրած «Մենք ենք մեր սարերը» գործակալության միջոցով բարեգործական ու սոցիալական մի շարք ծրագրեր  իրականացնել՝  ուղղված ադրբեջանական շրջափակման մեջ գտնվող բնակչության առողջապահական ու կենսական այլ կարիքների մեղմմանը: Այդ ընթացքում մասնավորապես ձեռք է բերվել էլեկտրամոբիլ՝  դիզվառելիքի եւ բենզինի իսպառ բացակայության պայմաններում հղի կանանց հիվանդանոց տեղափոխելու համար, բացվել է երկու սոցիալական-բարեգործական ճաշարան:

Նա  շրջափակման մեջ գտնվող արցախցիների կողքին գտնվել է  մինչեւ վերջ եւ, 2023թ. սեպտեմբերի 19-ին Ադրբեջանի կողմից ռազմական գործողություններից հետո, արցախցիների հետ միասին ստիպված է եղել լքել Ստեփանակերտը՝ շարժվելով դեպի Հայաստան:  2023 թվականի սեպտեմբերի 27-ին, Հայաստանի սահմանի մոտ, Հակարի կամրջի անցակետում Վարդանյանն ապօրինաբար կալանավորվել է Ադրբեջանի կողմից եւ մինչ օրս գտնվում է Բաքվի բանտում:

Ադրբեջանի իրավապահ մարմինների կողմից նրան առաջադրվել են ակնհայտ շինծու մեղադրանքներ: Նոբելյան Խաղաղության մրցանակի ներկայացված մարդասերն ու բարերարը մեղադրվում է Ադրբեջանի Քրեական օրենսգրքի երեք հոդվածներով՝ ահաբեկչության ֆինանսավորում, ապօրինի զինված խմբավորումների ստեղծում եւ սահմանի ապօրինի հատում: Նրան սպառնում է մինչեւ 14 տարվա ազատազրկում: