Հայաստանի Հանրապետությունում Հայրենական մեծ պատերազմի 44 վետերան կա եւ բոլորի սոցիալական պաշտպանվածությունն իրականացվում է օրենքով եւ իրավական այլ ակտերով սահմանված կարգով:

«Արմենպրես»-ի հետ զրույցում այս մասին նշեց ՀՀ աշխատանքի եւ սոցիալական հարցերի նախարարության հավասար հնարավորությունների ապահովման վարչության պետի տեղակալ Արթուր Կեսոյանը՝ ներկայացնելով Հայրենական մեծ պատերազմի վետերանների սոցիալական արտոնությունները:

«Ներկա պահին մենք շարժվում ենք հայրենական մեծ պատերազմի վետերանների մասին օրենքով, ըստ որի Հայրենական մեծ պատերազմի վետերաններ են Հայաստանի Հանրապետության այն քաղաքացիները եւ Հայաստանի Հանրապետությունում մշտապես բնակվող այն անձինք, ովքեր մասնակցել են Հայրենական մեծ պատերազմին, ինչպես նաեւ պատերազմի տարիներին Լենինգրադի բլոկադայի  մասնակիցները եւ ֆաշիստական համակենտրոնացման ճամբարների նախկին անչափահաս գերիները»,- ներկայացրեց նա:

Վետերանների սոցիալական պաշտպանվածությունն իրականացվում է օրենքով եւ իրավական այլ ակտերով սահմանված կարգով:

Նա տեղեկացրեց՝ վետերաններն իրավունք ունեն պետական պատվերի շրջանակներում ստանալ անվճար բժշկական օգնություն եւ բժշկական սպասարկում, ինչպես նաեւ արտոնյալ պայմաններով ստանալ առողջարանային բուժման ուղեգրեր` զինծառայողների համար օրենքով սահմանված կարգով: Վետերաններին էլեկտրաէներգիայից եւ տրանսպորտից օգտվելու նպատակով, իսկ հաշմանդամ վետերաններին` նաեւ գազի, ջրամատակարարման, ջրահեռացման եւ ջերմամատակարարման վարձերը վճարելու համար տրվում է ամենամսյա դրամական օգնություն` Հայաստանի Հանրապետության կառավարության սահմանած կարգով եւ չափով:

«Հաշմանդամ վետերաններն իրավունք ունեն նաեւ` 50 տոկոս զեղչով վճարել բնակարանի, աղբահանության, հեռախոսի եւ ռադիոյի վարձերը, ստանալ անվճար պրոթեզավորում եւ վերականգնողական պարագաներ` Հայաստանի Հանրապետության կառավարության սահմանած կարգով»,- հայտնեց նա:

Կեսոյանը ընդգծեց՝ վետերանները ստանում է ամենամսյա պատվովճար՝ 100 հազար դրամի չափով` Հայաստանի Հանրապետության կառավարության սահմանած կարգով: Պատվովճարի գումարը հարկման ենթակա չէ եւ չի հաշվառվում վետերանների կամ նրանց ընտանիքների սոցիալական կարիքավորության աստիճանը որոշելիս: Հոդվածով սահմանված արտոնությունների իրականացման ծախսերը ֆինանսավորվում են Հայաստանի Հանրապետության պետական բյուջեի, ինչպես նաեւ Հայաստանի Հանրապետության օրենսդրությամբ չարգելված այլ միջոցների հաշվին:

ՀՀ Մարշալ Բաղրամյանի վետերանների միավորման նախագահ Սիմոն Եսայանը նշեց՝ Հայաստանի վետերանների միավորումը Մայիսի 9-ը տոնելու է հստակ ծրագրով: Նա ցավով տեղեկացրեց՝ ողջ վետերանների 40 տոկոսն է, որ հենաշարժողական խնդիրներ չունի, մնացածը ի վիճակի չեն քայլել:

«Մեր ծրագիրն է լինել հաղթանակի այգում, ծաղիկներ խոնարհել Անհայտ զինվորի գերեզմանին, որից հետո մասնակցել «Անմահ գնդի» քայլերթին, նախատեսվում է ընդունելություն ՌԴ դեսպանատանը, ինչպես նաեւ «Անմահ գունդ» միջազգային կազմակերպությունում»,- ասաց Եսայանը:

Նա խոսեց նաեւ իրենց մտահոգող ամենամեծ խնդրից՝ ընդգծելով, որ մնացած խնդիրները բարձրաձայնելու կարիք չի տեսնում:

«Ամենակարեւոր խնդիրը հետեւյալն է. Հայրենական մեծ պատերազմի տարիներին թիկունքում գործունեություն ծավալած անձինք, որոնք ավելի մեծ ներդրում ունեն հաղթանակի մեջ, այսօր ոչ մի ուշադրության չեն արժանանում: ԱՊՀ վետերանների միջազգային միության կորդինացիոն խորհրդի անդամ եմ եւ կարող եմ փաստել, որ բոլոր նախկին հանրապետություններում, բացի Մերձբալթյան երկրներից, թիկունքայինները հավասարվեցված են Հայրենական մեծ պատերազմի վետերաններին: Հայաստանում դա չի արվում,- նշեց Եսայանը եւ հույս հայտնեց, որ խնդիրը լուծում կստանա: