Հաշվի առնելով այն հանգամանքը, որ ՀՀ Սյունիքի մարզի Տաթեւ համայնքի Տաթեւ բնակավայրի վարչական ղեկավար Գոռ Մինասյանի նկատմամբ իրականացվող հանրային քրեական հետապնդման վերաբերյալ զանգվածային լրատվության միջոցներով կատարված հրապարակումներում տեղ են գտել իրականությանը չհամապատասխանող, միակողմանի ներկայացված եւ խեղաթյուրված տեղեկություններ,  նրա պաշտպանական խումբը տարածել է հայտարարություն՝ դեպքի եւ դրան նախորդող իրադարձությունների վերաբերյալ։ Այն հրապարակում ենք ամողջությամբ․

«2023 թվականի հոկտեմբեր ամսից սկսած Գոռ Մինասյանի հարազատներին, բարեկամներին, ընկերներին, նրան ճանաչող եւ չճանաչող բազմաթիվ մարդկանց «Telegram» եւ «WhatsApp» հավելվածներով ուղարկվել են վերափոխված ձայնագրություններ եւ կեղծ հաղորդագրություններ, որոնցով դեռեւս այդ ժամանակ անհայտ անձինք նպատակ են հետապնդել արատավորել Գոռ Մինասյանի բարի համբավը, նվաստացնել նրա պատիվն ու արժանապատվությունը, սերմանել թշնամանք, հրահրել բախումներ եւ պատճառել հոգեկան ուժեղ տառապանք: Մասնավորապես, վերը նշված վերափոխված ձայնագրություններում եւ կեղծ հաղորդագրություններում առկա են եղել Գոռ Մինասյանի անձի, անձնական (ինտիմ) եւ ընտանեկան կյանքի վերաբերյալ ստահոդ տեղեկություններ, թե իբր վերջինս ունի սեռական շեղված կողմնորոշում, իբր վերջինս արտամուսնական կապի մեջ է գտնվում բազմաթիվ կանանց հետ (այդ հաղորդագրություններն ուղարկվել են նաեւ այդ կանանց ամուսիններին), իբր վերջինս սեռական բնույթի հայհոյանքներ է տալիս գյուղի երիտասարդների հասցեին եւ այլ նույնաբնույթ, իրականությանը չհամապատասխանող տեղեկատվություն: Բացի այդ, պարբերաբար նույնանման տեղեկատվություն պարունակող թռուցիկներ են հայտնաբերվել Տաթեւ բնակավայրի տարբեր հատվածներում, իսկ հետագայում պարզվել է նաեւ, որ նշված` դեռեւս այդ ժամանակ անհայտ անձանց կազմակերպմամբ, ուղղորդմամբ եւ նախաձեռնությամբ գաղտնալսող սարք է տեղադրված եղել Գոռ Մինասյանի ավտոմեքենայում: Նշվածին զուգահեռ, վախի եւ տագնապի զգացում առաջացնելու միտումով, Գոռ Մինասյանի շրջապատի մարդիկ ստացել են սպառնալիքներ եւ հետապնդումների են ենթարկվել անհայտ տրանսպորտային միջոցների կողմից:

Վերը նշված դեպքերի առթիվ ներկայացված հանցագործության մասին հաղորդումների հիման վրա նախաձեռնվել են քրեական վարույթներ (որոնցից առաջինը` 2023 թվականի հոկտեմբերի 24-ին), վարույթները միացվել են, սակայն իրավապահ մարմինների դրսեւորած անգործության կամ գործելու անկարողության պատճառով դեռեւս այդ ժամանակ անհայտ անձինք չեն բացահայտվել եւ շարունակել են իրենց չարամիտ, անբարոյական եւ անօրինական գործելակերպը ընդհուպ մինչեւ 2025 թվականի մայիսի վերջ: Ընդ որում, իրավապահ մարմինները տեւական անգործություն են ցուցաբերել այն պայմաններում, երբ նշված հանցագործությունից տուժած անձինք իրենց ցուցմունքներով հայտնել են հիմնավոր կասկածներ առ այն, թե ովքեր են կանգնած այդ ամենի հետեւում:

2025 թվականի հունիսի 16-ին Մ. Մ.-ն Գոռ Մինասյանին եւ նկարագրված հանցագործությունից տուժած այլ անձանց տեղեկացրել եւ համապատասխան ապացույցներ է ներկայացրել այն մասին, որ վերոնշյալ գործողությունները կատարել են իր բարեկամներ Մարո Մարտիրոսյանը եւ նրա եղբայրը` Կարո Մարտիրոսյանը: 2025 թվականի հունիսի 17-ի առավոտյան Մ.Մ.-ն եւ հանցագործությունից տուժած անձանցից Մ․ Թ-ն, Մ. Ծ.-ն եւ նրա ամուսինը ուղեւորվել են ՀՈԳՎ Գորիսի բաժին, որպիսի նշված տեղեկությունը հայտնեն իրավապահ մարմիններին: Մարո Մարտիրոսյանը, իմանալով այդ մասին եւ գիտակցելով, որ իր ու իր եղբոր հանցավոր գործունեությունը բացահայտվել է, ցանկանալով ամեն կերպ խոչընդոտել նշված անձանց` ոստիկանության բաժին հասնելը, իր կողմից վարվող ավտոմեքենայով շարժվել է նրանց հետեւից: Ճանապարհին նշված անձինք հանդիպել են Գոռ Մինասյանի ընկերոջը` Գեւորգ Հարությունյանին, եւ հայտնել նրան Մարո Մարտիրոսյանի եւ նրա եղբոր գործողությունները բացահայտված լինելու եւ դրանով պայմանավորված Մարո Մարտիրոսյանի կողմից իրենց հետապնդելու մասին: Դրանից որոշ ժամանակ անց, ըստ Գեւորգ Հարությունյանի կողմից հայտնած տեղեկությունների, նրա եւ Մարո Մարտիրոսյանի վարած ավտոմեքենաների միջեւ տեղի է ունեցել բախում, որից հետո Մարո Մարտիրոսյանի կողմից Գեւորգ Հարությունյանին հարվածելու եւ նրա ու նրա կնոջ հասցեին սեռական բնույթի հայհոյանք հասցնելու պատճառով Գեւորգ Հարությունյանն ապտակել է Մարո Մարտիրոսյանին:

Դեպքից 1 օր անց ձերբակալվել է նաեւ Տաթեւ բնակավայրի վարչական ղեկավար Գոռ Մինասյանը, որի նկատմամբ 2025 թվականի հունիսի 20-ին հանրային քրեական հետապնդում է հարուցվել եւ նրան մեղադրանք է ներկայացվել ՀՀ քրեական օրենսգրքի 264-րդ հոդվածի 2-րդ մասի 5-րդ կետով (խուլիգանական դրդումներով ուրիշի գույքը վնասելը), 297-րդ հոդվածի 2-րդ մասի 1-ին կետով (մի խումբ անձանց կողմից խուլիգանություն կատարելը) եւ 171-րդ հոդվածի 2-րդ մասի 5-րդ կետով (մի խումբ անձանց կողմից մեկ ուրիշի առողջությանը թեթեւ վնաս պատճառելը): Գոռ Մինասյանը չի ընդունել իրեն ներկայացված մեղադրանքը:

2025 թվականի հունիսի 21-ին միջնորդություն է ներկայացվել Սյունիքի մարզի առաջին ատյանի ընդհանուր իրավասության դատարան Գոռ Մինասյանի նկատմամբ որպես խափանման միջոց կալանքը երկու ամիս ժամկետով ընտրելու վերաբերյալ: Դատարանը, թեեւ արձանագրել է Գոռ Մինասյանի ձերբակալման ոչ իրավաչափ լինելու փաստը, որոշում է կայացրել ներկայացված միջնորդությունն ամբողջությամբ բավարարելու վերաբերյալ (այդ որոշման դեմ ՀՀ վերաքննիչ քրեական դատարան է ներկայացվել հատուկ վերանայման բողոք):

Ամփոփելով վերոգրյալը` արձանագրենք, որ շարունակվող հանցագործության պայմաններում իրավապահ մարմինների` շուրջ 1 տարի 8 ամիս դրսեւորած անգործության պատճառով Մարո Մարտիրոսյանը եւ Կարո Մարտիրոսյանը (նաեւ նրանց հետ հնարավոր համագործակցող անձինք (ըստ գյուղում շրջանառվող խոսակցությունների` վերջիններիս հովանավորում են ՀՀ ազգային ժողովի 2 պատգամավորներ)) չեն ենթարկվել քրեական պատասխանատվության: Դրա փոխարեն Մարո Մարտիրոսյանի գույքը ենթադրաբար վնասելու եւ նրա առողջությանը ենթադրաբար թեթեւ վնաս պատճառելու համար հանրային քրեական հետապնդման է ենթարկվել ու կալանավորվել Գոռ Մինասյանը:

Հորդորում ենք լրատվամիջոցներին այսուհետ զերծ մնալ միակողմանի կամ իրականությանը չհամապատասխանող տեղեկատվություն տարածելուց, իսկ իրավապահ մարմիններին կոչ ենք անում վերջապես գործել եւ պատասխանատվության ենթարկել Գոռ Մինասյանի եւ նրա բարեկամների, ընկերների, Տաթեւի համայնքի այլ բնակիչների նկատմամբ անբարոյական եւ անօրինական գործողություններ կատարած վերոնշյալ անձանց։

Գոռ Մինասյանի պաշտպաններ`

Արտակ Նավասարդյան

Սլավիկ Պողոսյան»: