Երեւանի Բաղրամյան պողոտան երեկվանից՝ հունիսի 9-ից փակ է: «Տավուշը հանուն հայրենիքի» շարժման մասնակիցները Բագրատ սրբազանի գլխավորությամբ գիշերն այստեղ են անցկացրել: Պողոտայում բազմաթիվ վրաններ են տեղադրված:

Ոստիկանները շարունակում են փակ պահել դեպի Դեմիրճյան փողոց գնացող հատվածը:

«Տավուշը հանուն հայրենիքի» շարժումը կոչ է անում միանալ ու լուծել Հայաստանի ապագայի հարցը։

Շարժման տարածած հայտարարությունում ասվում է. «Սիրելինե՛ր, հաղթանակի համար Սրբազան Հայրն ընդամենը 96 ժամ է խնդրել մեզանից. այդ ժամանակի մի մասն արդեն անցել է։ Երեկ մենք շատ կարեւոր արձանագրումներ ունեցանք։

Արդեն իսկ պարզ է, որ հաղթանակին հասնելու համար շատ բան պետք չէ՝ ընդամենը հաղթահարել ոստիկանական արգելքը։ Մենք կարող ենք դա անել։ Կարող ենք նաեւ այն պատճառով, որ ոստիկանների բացարձակ մեծամասնությունը հոգով ու մտքով մեզ հետ է։

Պարզապես տղաները գերության մեջ են։ Խուլիգաններն ու սուտասաններն են գերել նրանց։ Որոշներին էլ՝ կաշառել։ Պետք է ազատել մեր ոստիկաններին այդ գերությունից։ Պետք է ամեն ինչ անել, որպեսզի ոստիկանական շղթաներն ինքնաբուխ բացվեն ժողովրդի առջեւ եւ ճշմարտությունը հաղթի ստին։

Սիրելի՛ հայրենակիցներ, մի կողմ դրեք ձեր բոլոր գործերը։ Եկեք լուծենք Հայաստանի ապագայի հարցը։ Ընդամենը 3 օր եւ մենք կունենանք վերականգնվող, արդար, հզոր, հոգեւոր Հայաստան»,- ասվում է հաղորդագրությունում։