Ըստ shamshyan.com-ի՝ արդեն մեկ ժամից ավելի է՝ լարված իրավիճակ է ստեղծվել Արագածոտնի մարզում։ Երեւան-Վանաձոր ավտոճանապարհին՝ Ափնա գյուղի վարչական տարածքում, Վարդենուտ գյուղի 300-ից ավել բնակիչներ ի նշան բողոքի փակել են գլխավոր ճանապարհը։

«Այս ծայրահեղ քայլին դիմել ենք ստիպված, քանի որ պատկան մարմինները, այդ թվում՝ կառավարությունը, տեւական ժամանակ է մեր գլխի տակ փափուկ բարձ են դնում ու այդ ամենի արդյունքում գյուղը, որ դեռ հայտնի էր սովետական տարիներին, կանգնած է դատարկվելու շեմին։
Ինչ-որ «ՌԻՏ» ՍՊԸ որոշել է ողջ գյուղի բերրի հողերը գրոշներով իրենով անել՝ պատճառաբանելով, թե ստեղծում է էկոգյուղ, որտեղ լինելու է նաեւ դահուկավազքի եւ լեռնադահուկային կոմպլեքս, այդ թվում նաեւ ճոպանուղի, բայց դե որ գյուղը կանգնած է դատարկելու շեմին, դա փաստ է։
Ով է տեսել առանց գյուղացիների, տեղաբնակների հետ հարցը քննարկելու նման որոշում կայացնեն։ Էն, որ ասում ա՝ «գյուղ կանգնի, գերան կկոտրի», հիմա էդ ա։

Ողջ գյուղով մինչեւ վերջ կանգնելու ենք, որովհետեւ իրենց անմարդկային քայլով հանրահայտ գյուղերից մեկը կանգնած է դատարկելու շեմին։ Էդ ընկերություն կոչեցյալը, որոնց տերերի ուղեղները երեւի «սպրիչով» հանած ա, որոշել են ողջ գյուղին գցեն։ Սովետական տարիներին ծաղկող հանրահայտ գյուղը, որ անգամ ԽՍՀՄ փլուզումից հետո ողջ բնակչությունը աչքի լույսի պես պահել է, հիմա ինչ-որ «ՌԻՏ» որոշել է իր սեւ գործն անել։

Մենք կողմ ենք տնտեսության զարգացմանը, տուրիզմի զարգացմանը, մեր պայքարը քաղաքական չի, մենք պայքարում ենք մեր սերունդներին մեր պապերի ոփոխանցածը հանձնելու համար։

Մինչեւ վերջ կանգնելու ենք, էլի ենք ասում ու պնդում՝ մենք պայքարում ենք գյուղը փրկելու եւ ոչ միայն գյուղը, նաեւ՝ Հայաստանը, քանի որ եթե «ՌԻՏ»-ի նման անկուշտները էս գյուղում իրենց կատարածը մարսեն, վստահ ենք՝ բումերանգի նման մյուս գյուղերն էլ են դատարկելու։

Այս պահին ո՛չ մարզպետարանից, ո՛չ կառավարությունից չեն բարեհաճել ժամանել այստեղ որպեսզի հանդիպեն, սակայն ակնկալիք էլ չունենք, անցել են կուտ ուտելու ժամանակները, մենք պայքարում ենք գյուղը ու հենց Հայաստանը փրկելու համար», -ասել բողոքի ակցիայի մասնակիցները Գագիկ Շամշյանին։

Այս պահին երթեւեկությունը նշված հատվածում կաթվածահար է եղել եւ խցանումը հասնում է մի քանի կիլոմետրի: