Մարտի 9-ին Կապանում տեղի ունեցավ «Մանթաշյանց» գործարարների ակումբի Կապան մասնաճյուղի պաշտոնական բացումը։

Համահայկական միջազգային բիզնես ակումբի մասնաճյուղի բացման արարողությանը ներկա են գտնվել Կապան համայնքի ղեկավար Գեւորգ Փարսյանը, «Մանթաշյանց» գործարարների միության համահիմնադիր, նախագահ Վահրամ Միրաքյանը, Կապան մասնաճյուղի տնօրեն Գրիգորի Փարսյանը, միության 14 մասնաճյուղերից ժամանած մոտ 45, ինչպես նաեւ Կապանում գործունեություն ծավալող գործարարները։

Ողջույնի եւ շնորհավորանքի իր խոսքում համայնքի ղեկավարը կարեւորել է ակումբի ներկայությունը Կապանում, եւ հույս հայտնել, որ այն տեղի գործարարների համար նոր գործընկերային հարաբերություններ կստեղծի, նոր շուկաներ իրացնելու, արտադրանքը ներկայացնելու, բիզնեսը ընդլայնելու հնարավորություն կընձեռի, ինչու չէ նաեւ նոր կորպորատիվ մշակույթ կձեւավորի։

«Համայնքի կայուն զարգացումը, գործարար միջավայրի բարելավումը եւ ձեռնարկատիրական գործունեության խթանումը մեր առաջնահերթ եւ պարտադիր խնդիրների շարքում է։ Եվ դրանից ելնելով, մեր նպատականերից է փոքր եւ միջին բիզնեսի զարգացումը, խոշոր բիզնեսի համար ներդրումային նոր հնարավորությունների ստեղծումը եւ համայնքային մակարդակում մեր տնտեսության դիվերսիֆիկացումը» - ասել է Գեւորգ Փարսյանը։

Մանթաշյանց բիզնես ակումբի համահիմնադիր, նախագահ Վահրամ Միրաքյանի խոսքով՝ Կապանի մասնաճյուղը ակումբի համար ստրատեգիական կարեւորություն է ունենալու, քանի որ այն նպատակաուղղված է զարգացնելու Սյունիքի մարզի տնտեսությունը՝ նպաստելով մարզում բացի հանքարդյունաբերությունից նաեւ այլ ոլորտների զարգացմանը:

Կապան մասնաճյուղի տնօրեն Գրիգորի Փարսյանի համոզմամբ՝ կառուցողական, աշխատանքային ու ընկերական մթնոլորտում հնարավոր է հասնել լավագույն արդյունքի, իսկ բիզնեսում հաջողելու համար այդ նախապայմանները պարտադիր են։

«Միավորվելով խոշոր ու միջին գործարարներով կկարողանաք մեծացնել շփումների մեր շրջանակը, նոր ծանոթություններ կհաստատենք, ճանաչելիություն ձեռք կբերենք եւ, որ ամենակարեւորն է կունենաք փորձի փոխանակում։ Ակնկալում եմ, որ մասնաճյուղին անդամակցելու ցանկություն հայտնած յուրաքանչյուր գործարար կարճ ժամանակ անց կզգա «Մանթաշյանցի» ազդեցությունը իր բիզնեսում»–ասել է նա։

«Մանթաշյանց» գործարարների միությունն իր անդամներին տալիս է նեթվորքինգ՝ գործարար կապերի հնարավորություն աշխարհի տարբեր երկրների ու քաղաքների հայկական ծագումով գործարարների հետ, կրթական պրոեկտներ, որոնք օգնում են գործարարներին զարգանալ ու լուծել իրենց առջեւ ծառացած խնդիրները, օգտակար ու մոտիվացնող ժամանցային ծրագրեր, ինչպես նաեւ ներդրումներ ներգրավվելու կամ ներդրումներ անելու հնարավորություններ։

Նշենք, որ «Մանթաշյանց» գործարարների ակումբի Կապան մասնաճյուղը բացվել է Կապանի համայնքապետարանի աջակցությամբ եւ «Համայնքի ղեկավարները հանուն տնտեսական զարգացման նախաձեռնության «Պորտֆոլիո» ծրագրի շրջանակներում։