Կապանի համայնքապետ Գեւորգ Փարսյանը ֆեյսբուքյան գրառմամբ դիմել է Ազգային ժողովի «Քաղաքացիական պայմանագիր» խմբակցության պատգամավոր, ծննդով կապանցի Մարինա Ղազարյանին՝ հորդորելով նախքան Ազգային Ժողովի ամբիոնից ելույթ ունենալը՝ պահպանել քայլերի հաջորդականությունը։
«Նոյեմբերի 14-ի եւ ապրիլի 30-ի Ազգային ժողովի հերթական նիստերի ժամանակ, Սյունիքի մարզից ընտրված ԱԺ պատգամավոր Մարինա Ղազարյանը արդեն երկրորդ անգամ օգտագործելով երկրի բարձրագույն ամբիոնը, խոսում է Սզնակ եւ Դիցմայրի գյուղերի ջրամատակարարման խնդրի մասին՝ գաղափար չունենալով եւ չիմանալով նշյալ խնդիրների լուծմանն ուղղված ո՛չ քայլերի հաջորդականության, ո՛չ առավել եւս իրականացված աշխատանքների մասին:
Ուստի, որպես համայնքի ղեկավար, հարկ եմ համարում տեղեկացնել Մարինա Ղազարյանին, որ մենք լիովին տիրապետում ենք թե՛ քաղաքի, եւ թե՛ 38 գյուղական բնակավայրերի առաջնահերթ լուծում պահանջող բոլոր խնդիրներին եւ Ձեր կողմից դրանց մասին մեզ հիշեցնելու անհրաժեշտություն բնավ չենք տեսնում։ Փոխարենը, խորհուրդ ենք տալիս ԱԺ ամբիոնը պոպուլիստական եւ իրականությունից կտրված ելույթների համար չօգտագործել եւ խնդիրը համակողմանի ուսումնասիրելուց եւ դրանում հավաստիանալուց հետո միայն պատասխանատվության սլաքները ուղղել Տեղական ինքնակառավարման մարմինների վրա:
Ի գիտություն ԱԺ պատգամավորին եւ մնացած հետաքրքրվող անձանց՝ ստիպված եմ քայլ առ քայլ ներկայացնել խնդրի լուծման իրական պատկերը.
Հաշվի առնելով սահմանամերձ եւ սահմանամերձ դարձած բնակավայրերի ռազմավարական նշանակությունը, կենսական պայմանների ապահովման անհրաժեշտությունը եւ գյուղապահպանության խնդիրը` դեռեւս 2022 թվականին Կապանի համայնքապետարանը նախաձեռնել է Դիցմայրի եւ Սզնակ գյուղերի ջրամատակարարման համակարգի բարելավման եւ Սյունիք, Դիցմայրի, Սզնակ, Բարգուշատ գյուղերի ոռոգման համակարգի կառուցման նախագծանախահաշվային փաստաթղթերի կազմման գործընթացը: Նախագծման աշխատանքների ավարտից հետո Կապան համայնքի ավագանին 2023 թվականի նոյեմբերի 22-ի N 123-Ա որոշմամբ համաձայնություն է տվել Համայնքների սոցիալական եւ տնտեսական ենթակառուցվածքների զարգացմանն ուղղված սուբվենցիոն ծրագրային հայտերին, այդ թվում՝ վերոնշյալ գյուղերի ոռոգման եւ խմելու ջրի համակարգերի կառուցման ծրագրերին։
Համայնքապետարանը ՀՀ կառավարության 2006 թվականի նոյեմբերի 16-ի N 1708-Ն որոշմամբ հաստատված ժամկետներում եւ կարգով՝ ավագանու կողմից հավանության արժանացած ծրագրերը ներկայացրել է ՀՀ Սյունիքի մարզպետի աշխատակազմ՝ Տարածքային կառավարման եւ ենթակառուցվածքների նախարարությանը ներկայացնելու նպատակով։
Համաձայն վերոնշյալ որոշմամբ հաստատված կարգի՝ ծրագրերը ներկայացվում են միջգերատեսչական հանձնաժողովի քննարկմանը՝ մինչեւ ընթացիկ տարվա փետրվարի 15-ը։ Սակայն, մինչ օրս, համայնքապետարանը ծրագրերի վերաբերյալ դրական կամ բացասական բնույթի եզրակացություն չի ստացել: Այսինքն՝ սահմանված ժամկետները չեն պահպանվել:
Հետեւաբար, եթե իսկապես ցանկանում եք համայնքային նշանակության որեւէ խնդրի լուծմանը աջակցել, ապա ցուցաբերեք կառուցողական եւ առարկայական մոտեցում, հակառակ դեպքում ձեր կողմից Ազգային ժողովում մեր խնդիրները բարձրաձայնելու կարիքը մենք բացարձակապես չունենք:
Հ․Գ․ Հորդորում ենք, այսուհետ պահպանել քայլերի հաջորդականությունը, չկրկնել Սզնակ գյուղի օրինակը եւ խնդրի մասին տեղեկատվություն ստանալու գրությունները համայնքապետարան ուղարկել նախքան Ազգային Ժողովի ամբիոնից ելույթ ունենալը»,-գրել է Կապան համայնքի ղեկավար Գեւորգ Փարսյանը։
Իր հերթին պատգամավոր Մարինա Ղազարյանը պատասխանել է Գեւորգ Փարսյանին՝ կրկին ֆեյսբուքով։ Տիկին Ղազարյանի հավաստմամբ՝ լինելով օրենսդիր իշխանության ներկայացուցիչ մշտապես կարեւորել է համայնքային խնդիրների բարձրաձայնումը։
«Յուրաքանչյուր սյունեցու առօրյա խնդիրներին արագ եւ արդյունավետ կերպով լուծում տալու հարցը իմ ուշադրության կենտրոնում է եւ այդպես էլ շարունակվելու է։ Այսօր Կապանի համայնքապետը կրկին դրսեւորելով ապակառուցողական վարքագիծ, Կապան քաղաքից դուրս գտնվող բնակավայրերի խնդիրները արագ լուծելու փոխարեն, որոշել է Հայաստանի Հանրապետության Ազգային ժողովի պատգամավորին խորհուրդ տալ ԱԺ ամբիոնը «Պոպուլիստական եւ իրականությունից կտրված ելույթների համար չօգտագործել»։ Պարոն համայնքապետը նշում է, թե իբր խնդիրը համակողմանի ուսումնասիրելուց եւ դրանում հավաստիանալուց հետո միայն պատասխանատվության սլաքները պետք է ուղղել համայնքային իշխանություններին։
Ցանկանում եմ հստակ եւ միանշանակ ընդգծել, որ իմ պատգամավորական գործունեության ողջ ընթացքում ցանկացած խնդիր համակողմանի ուսումնասիրել եմ եւ դրանում հավաստիանալուց հետո եմ միայն հրապարակային խոսքով հանդես եկել։ Հարգելի՜ սյունեցիներ, հատկանշական է, որ եւ՜ Սզնակ գյուղի, եւ՜ համայնքային լիազորությունների շրջանակում առկա այլ հարցերով, գրությամբ դեռեւս նախորդ տարի էի դիմել Կապանի համայնքապետին, սակայն վերջինս խախտելով «Հայաստանի Հանրապետության Ազգային ժողովի պատգամավորի գործունեության երաշխիքների մասին» օրենքի 6֊-րդ հոդվածի 2-֊րդ մասի կարգավորումները, չի բարեհաճել անգամ պատասխանել իմ գրություններին եւ նման պայմաններում անգամ, փաստորեն, համայնքապետը հորդորում է ինձ` ցուցաբերել «կառուցողական մոտեցում», բացի այդ, նշում է, որ հակառակ դեպքում իմ կողմից Ազգային ժողովում խնդիրները բարձրաձայնելու կարիքը «մենք բացարձակապես չունենք» ։
Հետաքրքիր է, թե համայնքապետը «մենք » ասելով ու՞մ նկատի ուներ։ Այս համատեքստում ցանկանում եմ Կապանի համայնքապետի համար վկայակոչել Սահմանադրության 94-֊րդ հոդվածը` պատգամավորը ներկայացնում է ամբողջ ժողովրդին, կաշկանդված չէ հրամայական մանդատով, առաջնորդվում է իր խղճով եւ համոզմունքներով։ « Մենք»-֊ի շրջանակներում իմ եւ Կապան համայնքի շատ բնակիչների համար փաստ է, որ Կապան քաղաքից դուրս գտնվող գյուղերի բնակիչները կենսական նշանակության խնդիրների լուծման կարիք ունեն, իսկ այդ խնդիրների լուծման համար Կապանի համայնքապետը պետք է կատարի իր լիազորությունները, ոչ թե դրանք սահմանափակի միայն 2022 թվականին Դիցմայրի եւ Սզնակ գյուղերի ջրամատակարարման նախագծանախահաշվային փաստաթղթերի կազմման գործընթացով։
Կեցցե՜ Հայաստանի Հանրապետությունը»,-գրել է Մարինա Ղազարյանը։
0 Comments