.jpg)
Վարչապետ Նիկոլ Փաշինյանը ներկայացրեց, թե ինչ գործընթացներ են տեղի ունենում Հայաստանում եւ ինչու են այդ գործընթացները ցնցումներ առաջացնում։ Վարչապետը նաեւ ներկայացրել է, թե որն է «Քաղաքացիական պայմանագիր» կուսակցության առաքելությունը այս ամենում։
Մարտի 23-ին Գյումրիում «Քաղաքացիական պայմանագիր» կուսակցության նախաձեռնող խմբի նիստում վարչապետը կարեւոր համարեց խոսել այս գործընթացների մասին։
«Իմ գնահատմամբ շատ կարեւոր է արձանագրել, թե ինչ է մեզ հետ տեղի ունենում։ Ես, օրինակ, այս խնդրի, այս հարցի պարզաբանմանը շատ ժամանակ եմ տրամադրում, որովհետեւ պետք է արձանագրել, որ մեզ հետ տեղի ունեցածը, շատ իրադարձություններ եւ իրավիճակներ ցնցում են մեզ համար․ դրանք եւ՛ պետության առումով են ցնցում, եւ՛ մեզանից յուրաքանչյուրի համար անհատական առումով են ցնցում։ Բայց շատ կարեւոր է հասկանալ, թե ի՞նչ է տեղի ունենում եւ ինչո՞ւ։
Երկու օր առաջ Ազգային ժողովի հարց ու պատասխան տեղի ունեցավ, եւ պատգամավորներից մեկն իր հարցի մեջ օգտագործեց պատմական Հայաստան արտահայտությունը, ես էլ արձագանքեցի, որ ես պատմական Հայաստանի վարչապետը չեմ, ես իրական Հայաստանի, այս Հայաստանի վարչապետն եմ։ Եվ ես ուզում եմ ձեզ հետ կիսել այն միտքը, որ, իմ կարծիքով, տեղի է ունենում ունենում հետեւյալը՝ առաջին հերթին մեր մտքերում, ինչ-որ առումով նաեւ ֆիզիկապես շատ ցավոտ անցում է տեղի ունենում պատմական Հայաստանից դեպի իրական Հայաստան»,- ընդգծեց վարչապետը։
Վարչապետը կարեւոր համարեց այս գործընթացի հետ առեւերեսվել՝ որպես Հայաստանում կառավարող ուժ։
«Մենք պետք է այս պրոցեսը հասկանանք եւ այս պրոցեսի մասին մենք պետք է նախ ինքներս մեր մեջ խոսենք եւ հետո խոսենք ժողովրդի հետ»,- ասաց Փաշինյանը։
Վարչապետի խոսքով՝ «Քաղաքացիական պայմանագիր» կուսակցության առաքելությունն է առաջնորդել եւ ապահովել Հայաստանի ժողովրդի եւ պետության անցումը պատմական Հայաստանից իրական Հայաստան եւ ապահովել իրական Հայաստանի ինստիտուցիոնալ զարգացումը։
«Կարծում եմ, որ եթե մենք այս ընտրությունը չկատարենք եւ պատմական Հայաստանը լինի մեր գործողությունների մոտիվացիան, ես վախենամ, որ շատ մեծ կդարձնենք հավանականությունը, որ իրական Հայաստանը կդառնա պատմական Հայաստան»,-եզրափակեց Փաշինյանը։
0 Комментарий